ខេត្តមណ្ឌលគិរី៖ ដើម្បីកាត់បន្ថយអត្រាមរណភាព និងសុខុមាលភាពស្រ្តីក្រោយពីរំលូតកូន មន្ទីរសុខាភិបាលខេត្តមណ្ឌលគិរី សហការជាមួយអង្គការមូលនិធិដើមត្នោត រៀបចំវគ្គសិក្ខាសាលា ស្តីពីយុទ្ធសាស្រ្តសុខាភិបាល លើសុខភាពបន្តពូជ និងច្បាប់ស្តីពីការរំលូកកូននៃព្រះរាជាណាចក្រកម្ពុជា នាថ្ងៃទី២១ខែសីហានេះនៅមន្ទីរសុខាភិបាលខេត្តមណ្ឌលគិរី។
សូមបញ្ជាក់ថា គោលបំណងសិក្ខាសាលានេះរៀបចំឡើង ដើម្បីផ្សព្វផ្សាយបង្កើនចំណេះដឹង ផ្នែកច្បាប់ ស្តីពីការរំលូតកូននៅក្នុងប្រទេសកម្ពុជា និងចូលរួមលើកកម្ពស់ការគាំទ្រផ្នែកច្បាប់ជាវិជ្ជមានចំពោះអ្នកផ្តល់ និងអ្នកទទួលសេវាថែទាំរំលូតកូន និងបង្កើនកិច្ចសហប្រតិបត្តិការ ក្នុងរង្វង់មន្ត្រីសុខាភិបាល អាជ្ញាធរដែនដី និងអាជ្ញាធរមានសមត្ថកិច្ច។
ក្នុងវគ្គសិក្ខាសាលានោះ លោក ប៊ុនសួ ប្រធានមន្ទីរសុខាភិបាលខេត្តមណ្ឌលគិរី បានមានប្រសាសន៍ថា រាជរដ្ឋាភិបាល ក៏ដូចជាក្រសួងសុខាភិបាល បានខិតខំស្វះស្វែង ក្នុងការរិះរក និងបង្កើតច្បាប់នៃការរំលូតកូនឲ្យបានលឿន ដើម្បីឲ្យស្ត្រីទូទាំងប្រទេសទទួលបាននូវសុខភាពល្អ សុវត្ថិភាព និងកាត់បន្ថយអត្រាមរណភាព។
លោក ម៉ិល ច័ន្ទដន តំណាងអង្គការមូលនិធិដើមត្នោតបានបញ្ជាក់ថា ចំពោះការរំលូតកូន និងមរណភាព ពិការភាពមាតាក្នុងពិភពលោកៈ (WHO 2011) ស្រ្តី ២១.៦ លាននាក់ បានធ្វើការរំលូតកូនដោយមិនមានសុវត្ថិភាព ក្នុងនោះស្រ្តី ៤៧.០០០នាក់ បានស្លាប់ និងស្រ្តី ៥លាននាក់ទទួងរងនូវពិការភាព។
លោកបានបន្តថា ចំពោះប្រទេសកម្ពុជាវិញ ៧%នៃស្ត្រីក្នុងវ័យបន្តពូជ ធ្លាប់បានធ្វើការរំលូតកូនក្នុងរយះពេល៥ឆ្នាំកន្លងមកនេះ ក្នុងនោះ៤០%នៃការរំលូតកូន ធ្វើឡើងដោយអ្នកដែលពុំមានជំនាញ និងមិនស្របច្បាប់៦%នៃការរំលូតកូន ធ្វើឡើងដោយការកោសសម្អាត (Curettage) នេះបើតាមការអង្កេតប្រជាសាស្រ្តស្តីពីសុខភាពនៅក្នុងប្រទេសកម្ពុជា ឆ្នាំ២០១៤។
លោកបន្តទៀតថា មូលហេតុដែលបណ្តាលឲ្យស្រ្តីបានស្លាប់ និងពិការភាពដោយសារការរំលូតកូនមិនមានសុវត្ថិភាពនោះ ទី១ស្ត្រីមិនអាចរកបាននូវសេវារំលូតកូនប្រកបដោយសុវត្ថិភាព (តម្លៃ ចម្ងាយផ្លូវ ភាពជាឯកជន…) ទី២ ស្រ្តីមិនដឹងពីសេវាថែទាំរំលូតកូនស្របច្បាប់ដែលមានសុវត្ថិភាព និងទី៣ ស្រ្តីដែលចង់ប្រើការពន្យាកំណើត តែមិនអាចរក ឬទទួលសេវាបាន៕
