ខេត្តមណ្ឌលគិរី ៖ សិស្សពូកែចាប់ពីលេខ១ដល់លេខ៣ចំនួន៧៩នាក់នៅសាលាបឋមសិក្សា ហ៊ុន សែន មណ្ឌលគិរី បានទទួលរង្វាន់ប័ណ្ណសរសើរលើកទឹកចិត្តពីក្រសួងអប់រំយុវជន និងកីឡា ក្នុងកាសពិធីបិទបវេសនកាលឆ្នាំ២០១៨ ២០១៩ នាព្រឹកថ្ងៃទី៣០ សីហានេះ។
តាមការបញ្ជាក់ពីលោក សាន់ ដារិទ្ឋ ប្រធានសម្ពន្ធយុវជនស្រឡាញ់សន្តិភាពបានឲ្យដឹងថា ជាគោលការណែនាំរបស់ក្រសួងអប់រំ គឺតម្រូវឲ្យសាលារៀនផ្តល់នូវរង្វាន់សម្រាប់សិស្សពូកែចាប់ពីលេខ១ដល់លេខ៣ ដើម្បីជាការលើកទឹកចិត្តដល់សិស្សា នុសិស្សដែលបានខិតខំប្រឹងប្រែងរៀនសូត្រ ឱ្យក្លាយខ្លួនទៅជាសិស្សពូកែ។
ប្រធានសម្ពន្ធយុវជនស្រឡាញ់សន្តិភាពបានថ្លែងអំណរគុណដល់លោកគ្រូ អ្នកគ្រូ ដែលបានយកចិត្តទុកដាក់ខ្ពស់ក្នុងការបង្ហាត់បង្រៀនដល់សិស្សានុសិស្ស ដោយមិនគិតពីការនឿយហត់រហូតដល់សិស្សអាចទទួលបានលទ្ឋផលយ៉ាងល្អប្រសើរ ថែមទាំងបានផ្តល់ការមើលថែរក្សាពីសុខសុវត្ថិភាពដល់សិក្សានុសិស្ស ក្នុងនាមជាអាណាព្យាបាលទីពីរបន្ទាប់ពីឪពុកម្តាយ។
បើតាមការសំណូមពរ របស់លោកគ្រូ និងអ្នកគ្រូ និងមាតា បិតាសិស្ស ស្នើសូមឲ្យជួយឧបត្ថម្ភបន្ថែមដល់សិស្សជាប់ចំណាត់ថ្នាក់លេខ៤ និងលេខ៥។ទន្ទឹមនោះអាណព្យាបាលសិស្សបានលើកឡើងថា ទោះបីខេត្តមណ្ឌលគិរី ស្ថិតនៅតំបន់ឥសាន្តនៅឆ្ងាយពីរាជធានីភ្នំពេញមែន ការបង្ហាត់បង្រៀនដល់សិស្សានុសិស្សមានគុណភាពខ្ពស់ មិនចាញ់សាលាផ្សេងៗឡើយ៕
