កំពង់ធំ៖ ប្រជាពលរដ្ឋជាង៣០០គ្រួសារ ដែលរងគ្រោះដោយសារទឹកជំនាន់ នៅក្នុងស្រុកប្រាសាទសំបូរ ខេត្តកំពង់ធំ បានទទួលអំណោយកាកបាទក្រហមកម្ពុជាហើយនៅថ្ងៃទី ថ្ងៃទី២៤ ខែកញ្ញា ឆ្នាំ២០១៩នេះ។
លោក សុខ លូ អភិបាលខេត្តកំពង់ធំ បាននាំយកអំណោយមនុស្សធម៌សាខាកាកបាទក្រហមកម្ពុជាខេត្តកំពង់ធំ ចែកជូនបងប្អូនប្រជាពលរដ្ឋដែលមាន ជីវភាពខ្វះខាត ទាំងនោះ មានសរុបចំនួន ៣៥៣គ្រួសារ អញ្ជើញមកពី៥៩ភូមិ នៅក្នុង៥ឃុំ នៃស្រុកប្រាសាទសំបូរ។
ពិធីចែកអំណោយនេះ ធ្វើឡើងនៅ ២ទីតាំងផ្សេងគ្នា ក្នុងស្រុកប្រាសាទសំបូរ គឺទីតាំងទី១ ចែកនៅក្នុងបរិវេណវត្តវត្តចាន់ម៉ូលី ភូមិកំពង់ឈើទាល ដែលមានបងប្អូនចំនួន ១៦៥គ្រួសារ អញ្ជើញមកពីឃុំសំបូរ និងឃុំតាំងក្រសៅ ហើយទីតាំងទី២ ចែកនៅក្នុងបរិវេណវត្តកំពង់ជ្វា ភូមិកំពង់ជ្វា ដែលមានបងប្អូនចំនួន១៨៨គ្រួសារ អញ្ជើញមកពីឃុំឈូក ឃុំគោល និងឃុំស្រើង។ អំណោយមនុស្សធម៌ ដែលនាំយកទៅ ចែកជូនបងប្អូនប្រជាពលរដ្ឋ នាព្រឹកនេះ ក្នុង១គ្រួសារទទួលបាន អង្គរ២០គីឡូក្រាម មី១កេះ ត្រីខ១យួរ មុង១ ភួយ១ សារុង១ ក្រមា១ និងអាវយឺត២។
នាឱកាសចែកអំណោយនោះដែរ ប្រធានគណៈកម្មាធិការសាខាកាកបាទក្រហមខេត្តកំពង់ធំ បានជំរុញដល់អាជ្ញាធរមូលដ្ឋានទាំងអស់ ចុះស្រង់ស្ថិតិបងប្អូនដែលទទួលផលប៉ះពាល់ដោយទឹកជំនន់ឱ្យបានត្រឹមត្រូវ មន្ទីរកសិកម្ម រុក្ខាប្រមាញ់ និងនេសាទខេត្ត ត្រូវត្រៀមស្រូវពូជ និងគ្រាប់ពូជដំណាំ សម្រាប់ផ្តល់ជូនបងប្អូនដែលទទួលផលប៉ះពាល់ទាំងនេះ ដើម្បីបង្កបង្កើនផលនៅពេលទឹកស្រកទៅវិញ។
ចំណែកឯមន្ទីរអភិវឌ្ឍន៍ជនបទខេត្ត និងមន្ទីរសាធារណការ និងដឹកជញ្ជូនខេត្ត ត្រូវត្រួតពិនិត្យការខូចខាតផ្លូវលំ ដើម្បីត្រៀមលក្ខណៈធ្វើការជួសជុលឡើងវិញនៅពេលទឹកស្រក ហើយមន្ទីរធនធានទឹក និងឧតុនិយម នៅពេលទឹកស្រក ត្រូវត្រៀមក្នុងការស្ដារប្រឡាយឡើងវិញ ដើម្បីជួយសម្រួលដល់ការបង្កបង្កើនផលរបស់ប្រជាពលរដ្ឋ៕
