បាត់ដំបង៖ ថ្លែងចេញពីខេត្តបាត់ដំបងនៅថ្ងៃទី២៤ ខែកញ្ញា ឆ្នាំ២០១៩នេះ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក បានលើកឡើងថា រាជរដ្ឋាភិបាល បានយកចិត្តទុកដាក់ចំពោះកិត្តិយស និងជីវភាពរបស់កងទ័ព តាមរយៈការដំឡើងប្រាក់បៀវត្ស និងផ្តល់គោលនយោបាយ និងសេវាផ្សេងជាច្រើនទៀត រួមមានបេឡាជាតិសន្តិសុខសង្គម។
ឧត្តមសេនីយ៍ឯក ហ៊ុន ម៉ាណែត បានគូសបញ្ជាក់ថា ការយកចិត្តទុកដាក់នេះ មិនមែនធ្វើតែពេលបំពេញភារកិច្ចនោះទេ គឺធ្វើគ្រប់ដំណាក់កាលទាំងអស់ គឺពេលកំពុងបំពេញភារកិច្ច និងក្រោយពេលបំពេញភារកិច្ច គឺយើងបន្តជួយតាមយន្តការ សមាគមអតីតយុទ្ធជន។ នេះគឺជាយន្តការរាជរដ្ឋាភិបាល ដែលយកចិត្តទុកដាក់ចំពោះកងទ័ព និងអតីតយុទ្ធជន។
ក្នុងឱកាសដែលឧត្តមសេនីយ៍ឯក ហ៊ុន ម៉ាណែត អញ្ជើញសំណេះសំណាល និងបំពាក់ឋានន្តរសក្តិជូនយោធិន ត្រូវចូលនិវត្តន៍ឆ្នាំ២០១៩ របស់យោធភូមិភាគទី៥ និងកងពលតូចអន្តរាគមន៍លេខ១៤ កងទ័ពជើងគោក ខេត្តបាត់ដំបង នាព្រឹកថ្ងៃទី២៤ ខែកញ្ញា ឆ្នាំ២០១៩នេះ។
ឧត្តមសេនីយ៍ឯក ហ៊ុន ម៉ាណែត បានលើកឡើងថា ការបំពាក់ឋានន្តរសក្តិជូនដល់អ៊ំពូមីងនេះ គឺជាលើកទី២ហើយ ហើក៏ជាប្រវត្តិសាស្ត្រសម្រាប់កងទ័ពកម្ពុជា។ ការបំពាក់លើកទីមួយ គឺបំពាក់ជូនអ៊ំពូមីង ដែលចូលបម្រើ កងទ័ពឆ្នាំ១៩៧៩ចុះ ហើយលើកនេះ គឺការបំពាក់អ៊ំពូមីង ដែលចូលនិវត្តន៍ ដែលនេះ គឺជាករណីពិសេស ដែលយើងបំពាក់ឋានន្តរស័ក្កិ ជូនអ៊ំពូមីងមុនចូលនិវត្តន៍វត្ត។ គោលនយោបាយ នៃការលើកទឹកចិត្តនេះ គឺធ្វើសម្រាប់នេះ នាយទាហានដែលបានបំពេញភារកិច្ច ជាពិសេសនៅក្នុងដំណាក់កាលដ៏លំបាក។
ក្នុងឱកាសនោះ ឧត្តមសេនីយ៍ឯក ហ៊ុន ម៉ាណែត បានថ្លែងថា អ៊ំពូមីងគឺជាអតីតយុទ្ធជន សូមបន្តការជឿទុកចិត្តចំពោះការដឹកនាំរបស់រាជរដ្ឋាភិបាល ចូលរួមថែរក្សាសុខសន្តិភាព និងចូលរួមផ្សព្វផ្សាយ ចែករំលែកការលំបាក បទពិសោធន៍ និងណែនាំឲ្យយុវជនជំនាន់ក្រោយ កាន់តែយល់ច្បាស់នៅក្នុងការថែរក្សាសុខសន្តិភាព និងស្ថិរភាពព្រោះថា អ្នកដែលមានជីវិតមកដល់សព្វថ្ងៃនេះ គឺសុទ្ធតែមានសំណាង ដែលមានឱកាសនៅមើលមុខកូនចៅ៕
