ប៉ៃលិន៖ ឆ្លៀតក្នុងឳកាសចុះសាកសួរសុខទុក្ខ កងកម្លាំងការពារព្រំដែនកម្ពុជា-ថៃ នៅថ្ងៃទី៣០ ខែកញ្ញានេះ អភិបាលខេត្តប៉ៃលិន លោក ផាន់ ចាន់ធុល បានក្រើនរំលឹកដល់កម្លាំងទាំងអស់ មិនត្រូវកុំជឿតាមឃោសនារបស់ទណ្ឌិត សម រង្ស៊ី ដែលជាចេតនាក្បត់ជាតិ សាសនា ព្រះមហាក្សត្រ នោះឡើយ។
ការចុះសាកសួរសុខទុក្ខព្រមនោះក៏លោកអភិបាលខេត្តក៏បាននាំយកអំណោយ គ្រឿងឧបភោគបរិភោគ នំអន្សម និងថវិកាទៅឧបត្ថម្ភ ដល់កងកម្លាំងការពារព្រំដែនកម្ពុជា-ថៃ ភូមិសាស្ត្រខេត្តប៉ៃលិន នៅចំណុចអូរអែម ទីបញ្ជាការនគរបាលវរៈការពារព្រំដែនលេខ៨២១ ស្ថិតក្នុងសង្កាត់បរយ៉ាខា ក្រុងប៉ៃលិន ខេត្តប៉ៃលិន បន្ទាប់ពីបុណ្យកាន់បិណ្ឌ និងភ្ជុំបិណ្ឌបានបញ្ចប់ផងដែរ។
អភិបាលខេត្តរូបនេះ បានលើកឡើងថា កម្លាំងប្រដាប់អាវុធទាំងអស់ ត្រូវយកចិត្តទុកដាក់ពង្រឹងកិច្ចសហការគ្នា ជាមួយសមត្ថកិច្ចពាក់ព័ន្ធឱ្យបានជិតស្និទ្ធ ដើម្បីថែរក្សាការពារសន្តិសុខ សណ្តាប់ធ្នាប់ជូនប្រជាពលរដ្ឋ និងការពារបូរណភាពទឹកដីកម្ពុជាឱ្យបានគង់វង្ស ជាពិសេស សូមកងកម្លាំងទាំងអស់ថែទាំសុខភាព ព្រោះរដូវនេះមានភ្លៀងច្រើន អាចងាយនឹងកើតជំងឺដម្កាត់ផ្សេងៗ។
លោកឧត្តមសេនីយ៍ត្រី លី បួយ ស្នងការរងទទួលបន្ទុក វរៈការពារព្រំដែនលេខ៨២១ បានថ្លែងអំណរគុណយ៉ាងជ្រាលជ្រៅ ដល់ថ្នាក់ដឹកនាំ មន្រ្តីរាជការ ប្រជាពលរដ្ឋ និងព្រះសង្ឃក្នុងខេត្តប៉ៃលិន ទាំងអស់ ដែលតែងតែយកចិត្តទុកដាក់ចុះសាកសួរសុខទុក្ខ និងឧបត្ថម្ភដល់កម្លាំងទាំងអស់ ជាញឹកញាប់ហើយនេះ គឺជាការលើកទឹកចិត្តដល់កងកម្លាំង ប្រដាប់អាវុធទាំងអស់ ក្នុងការអនុវត្ត ភារកិច្ចតួនាទីរបស់ខ្លួន ដើម្បី កិច្ចការពារបូរណភាពទឹកដី ឱ្យបានរឹងមាំនៅតាមខ្សែរបន្ទាត់ព្រំដែនកម្ពុជា-ថៃ និងពង្រឹងកិច្ចការពារសន្តិសុខ សណ្តាប់ធ្នាប់ជូនប្រជាពលរដ្ឋ ឱ្យបានល្អប្រសើផងដែរ៕
