ភ្នំពេញ៖ ក្នុងជំនួបជាមួយ លោក វេង សាខុន រដ្ឋមន្ដ្រីកសិកម្ម រុក្ខាប្រមាញ់ និងនេសាទ នៅថ្ងៃទី១១ ខែតុលា ឆ្នាំ២០១៩នេះ លោក MIKAMI Masahiro ដែលជាឯកអគ្គរាជទូតថ្មី នៃប្រទេសជប៉ុនប្រចាំកម្ពុជា បានអោយដឹងថា
វិស័យកសិកម្មកម្ពុជា បាននិងកំពុងដើរតួនាទីយ៉ាងសំខាន់ ក្នុងការជួយទ្រទ្រង់កំណើនសេដ្ឋកិច្ច និងជាវិស័យដែលមានសក្តានុពលខ្ពស់ សម្រាប់អនាគត តែក្នុងពេលបច្ចុប្បន្ននេះ គឺកំពុងមានប្រឈមជាមួយ នឹងបញ្ហាកង្វះខាត ខាងហេដ្ឋារចនាសម្ព័ន្ធគាំទ្រ គឺនៅមានកម្រិត ហេតុដូច្នេះ ក្នុងអាណត្តិថ្មីនេះ លោកនឹងខិតខំបន្តសហការ និងគាំទ្រឲ្យអស់លទ្ធភាព។
ជាពិសេសលោក នឹងពិនិត្យពិចារណាលើគម្រោងថ្មីៗ ដែលអាចជួយដល់ការអភិវឌ្ឍវិស័យកសិកម្ម ព្រមទាំងខិតខំកៀរគរ វិនិយោគិនជប៉ុនមកសិក្សា ពីឱកាសវិនិយោគលើវិស័យនេះ ដើម្បីបង្កើនភាពប្រកួតប្រជែងទីផ្សារ លើកកម្ពស់កម្រិតជីវភាពរបស់ប្រជាកសិករ និងជារួមអភិវឌ្ឍន៍វិស័យនេះ ឲ្យកាន់តែរីកចម្រើនថែមទៀត។
ពាក់ព័ន្ធនឹងវិស័យកសិកម្ម លោករដ្ឋមន្ត្រី វេង សាខុន បានកោតសរសើរ និងវាយតម្លៃខ្ពស់ ចំពោះការបន្តជួយឧបត្ថម្ភគាំទ្រពីរាជរដ្ឋាភិបាលជប៉ុន តាមរយៈអង្គការ JICA លើការងារបណ្តុះបណ្តាល បច្ចេកទេស ការពង្រឹងសមត្ថភាពសហគមន៍កសិកម្ម ទីផ្សារកសិកម្ម និងថ្មីៗនេះ បានជួយបង្កើតមជ្ឈមណ្ឌលពិសោធន៍គីមី និងវេចខ្ចប់បន្លែសុវត្ថិភាព។
លោករដ្ឋមន្ត្រី សង្ឃឹមនិងជឿជាក់ថា រាជរដ្ឋាភិបាលជប៉ុន តាមរយៈលោកឯកអគ្គរាជទូតថ្មី នឹងបន្តគាំទ្រ និងជួយអភិវឌ្ឍប្រទេសកម្ពុជា ជាពិសេសវិស័យកសិកម្ម ដោយផ្តោតជាសំខាន់លើការគាំទ្រ ដល់ការបង្កើន សមត្ថភាពសហគមន៍ ការកសាងហេដ្ឋារចនាសម្ព័ន្ធគាំទ្រ បច្ចេកវិទ្យា និងបច្ចេកទេសក្នុងការធ្វើកសិកម្មតាមបែបទំនើប លើកកម្ពស់ការកែច្នៃ វេចខ្ចប់ប្រកបដោយគុណភាព និងស្តង់ដារ និងកៀរគរវិនិយោគិន ពីប្រទេសជប៉ុនមកវិនិយោគ ដើម្បីអភិវឌ្ឍន៍វិស័យនេះ ប្រកបដោយចីរភាព និងនិរន្តរភាព៕
