តាកែវ៖ បទល្មើសនេសាទក្នុងខេត្តតាកែវត្រូវបានគេរាយការណ៍មកថា មានភាពគគ្រឹកគគ្រេងសុទ្ធតែទូកវៀតណាមជាច្រើនគ្រឿង ចូលមកធ្វើការនេសាទដោយប្រើឧបករណ៍នេសាទខុសច្បាប់។ ក្នុងរឿងនេះ អ្នកនេសាទម្ចាស់ស្រុក អំពាវនាវឲ្យមន្ត្រីជំនាញចុះអន្តរាគមន៍ឲ្យបានស្មើរភាព កុំធ្វើការគាបសង្កត់តែខាងពួកគាត់ជាខ្មែរធ្វើការនេសាទតិចទួចបែជាចាប់គ្មានត្រាប្រណី រីឯជនជាតិវៀងណាមបែជាអាជ្ញាធរធ្វើព្រងើយ ដោយសារលាបសក្ការៈទៅវិញ។
ទូកវៀតណាមដែលចូលមកនេសាទបាននេះ ក្រុមអ្នកនេសាទជនជាតិវៀតណាម បានឲ្យដឹងថា ពួកគេបានបង់លុយឲ្យអ្នករត់ការឈ្មោះ កេ ជាជនជាតិវៀតណាមតាមតម្លៃខុសៗគ្នា។
បើតាមការរៀបរាប់ តម្លៃដែលត្រូវបង់រួមមាន៖
– ទូកនេសាទដាក់លបក្តាមបង់លុយ ៧លានដុង
– ទូកដាក់លបប្រើសមួយរយ ហៅលបនរក ឬលបពោះវៀនជ្រូក បង់ ១១លានដុង
– ទូកដាក់បង្កងបង់ ១២លានដុង
– ទូកដាក់ឡុកសៃយ៉ឺនស្បៃមុងខ្នាតតូចបង់ ១៣លានដុង
– ទូកដាក់ឡុកសំណាញ់ក្រឡាញឹក និងសៃយ៉ឺនស្បៃមុងខ្នាតយក្សបង់ ១៥លានដុងក្នុងមួយរដូវ
– របាំងធ្នួសសៃយ៉ឺនស្បៃមុងខ្នាតយក្ស ក្នុងមួយខ្សែៗតាមវែងខ្លីត្រូវបង់លុយឲ្យទៅឈ្មោះ កេ ជាជនជាតិវៀតណាមដែលជាអ្នករត់ការ ក្នុងមួយខ្សែចាប់ពី ១ម៉ឺនដុល្លារ ទៅ ២ម៉ឺនដុល្លារ។
គេមិនដឹងថា លុយដែលបង់ឲ្យឈ្មោះ កេ ដែលជាអ្នករត់ការនោះ ត្រូវបានយកទៅចែកចាយបង់បន្តឲ្យអ្នកណានោះទេ។ គេគ្រាន់តែបានបញ្ជាក់ថា ករណីបែបនេះ គឺបានធ្វើជាច្រើនឆ្នាំមកហើយ។
ទូកជនជាតិវៀតណាមរាប់សិបទូក ឆ្លងចូលមកនេសាទដោយប្រើឧបករណ៍សៃយ៉ឺនស្បៃមុង និងសំណាញ់សាច់អួនក្រឡាញឹកខ្នាតយក្ស ដែលមានរបាំងធ្នួសជាច្រើនខ្សែ ក្នុងមួយខ្សែ មានប្រវែងរាប់ ពាន់ម៉ែត្រ ដែលជនជាតិវៀតណាម រាយដាក់នៅក្នុងបឹងចាប់ពីទឹកដី ឃុំគោកធ្លក ស្រុកអង្គរបុរី រហូតទៅ ដល់ ស្រុកបុរីជលសានោះ អាជ្ញាធរ និងមន្ត្រីជំនាញពិតជាធ្វើមិនដឹង ហើយបានមើលរំលង និងបណ្តោយឲ្យ កើតមានជារៀងរាល់ឆ្នាំទៅវិញ។
បទល្មើសនេសាទទាំងនេះ ស្ថិតនៅចំណុច លោកតាក្រហមករហូតដល់បាក់ដៃ កំពង់ក្រសាំង កំពង់អំពិល កំពង់យោលខាងត្បូង និងខាងលិចភ្នំបុរី។ យ៉ាងណាក៏ដោយជុំវិញបញ្ហានេះ សារព័ត៌មានយើងសង្ឃឹមថា អាជ្ញាធរពាក់ព័ន្ធនិងអាចធ្វើការបំភ្លឺឲ្យបានច្បាស់លាស់។ 
