ភ្នំពេញ៖ ក្នុងជំនួបជាមួយលោក ប្រតិភូក្រុមការងាររៀបចំសមយុទ្ធនាគមាស ឆ្នាំ២០២០ កងទ័ពជើងគោក នៃកងទ័ពរំដោះប្រជាជនចិនប្រចាំភាគខាងត្បូង ដឹកនាំដោយលោកវរសេនីយ៍ឯកពិសេស ចាង យ័ន សុង នៅព្រឹកថ្ងៃទី២៣ ខែតុលា នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ បានលើកឡើងថា
ជាការល្អសម្រាប់សមយុទ្ធនាគមាសឆ្នាំ២០២០គួរជ្រើសរើសយកទីលានបាញ់គ្រាប់ពិតតេជោសែន ក្នុងស្រុកជុំគីរី ខេត្តកំពត របស់កងពលតូចលេខ៧០ ដូចដែលបានរួមគ្នាធ្វើពីរឆ្នាំមុនៗ ព្រោះទីតាំងនោះមានទីលានស្រាប់ និងកន្លែងស្នាក់នៅស្រាប់។
ប្រធានគណៈកម្មការរៀបចំសមយុទ្ធនាគមាសឆ្នាំ២០២០កម្ពុជា-ចិន បានបន្តថា ទីលានថ្មីរបស់កងពលតូចទ័ពពិសេសឆត្រយោងលេខ៩១១ ដែលក្រុមការងារជំនាញទាំងពីរ បានចុះទៅពិនិត្យមើលនោះ យើងនឹងរួមគ្នាបន្តសិក្សាស្រាវជ្រាវ និងកសាងទីតាំងថ្មីនោះ សម្រាប់ឆ្នាំបន្តបន្ទាប់ខាងមុខទៀត ព្រោះទីតាំងថ្មីនេះ ក៏ពុំទាន់បានកសាងនូវអ្វីនៅឡើយទេ។
ជាការឆ្លើយតប លោកវរសេនីយ៍ឯកពិសេស ចាង យ័នសុង ជំនួសមុខឱ្យប្រតិភូក្រុមការងាររៀបចំសមយុទ្ធនាគមាស ឆ្នាំ២០២០ កងទ័ពជើងគោកនៃកងទ័ពរំដោះប្រជាជនចិន លោកបានសម្ដែងនៅការអរគុណ ចំពោះនាយឧត្តមសេនីយ៍ ដែលជាប្រធានគណៈកម្មាធិការរៀបចំ សមយុទ្ធនាគមាស ឆ្នាំ២០២០ របស់ភាគីកងទ័ពកម្ពុជា បានផ្ដល់ពេលវេលាដ៏សមគួរមួយ អនុញ្ញាតឱ្យក្រុមការងាររបស់លោក បានចូលជួបសំដែងការគួរសមនិងពិភាក្សាការងារ អំពីរបៀបរៀបចំនៃសមយុទ្ធនាគមាសសម្រាប់ ឆ្នាំ២០២០ ខាងមុខនេះ ឱ្យមានភាពរលូន នឹងទទួលបានជោគជ័យដូចបណ្ដាឆ្នាំកន្លងមក។
លោក ចាង លើកឡើងថា ក្នុងអំឡុងពេលស្នាក់នៅ និងធ្វើទស្សនកិច្ចសិក្សា ដើម្បីរៀបចំសមយុទ្ធលើកនេះ ក្រុមការងាររបស់ភាគីកងទ័ពរំដោះប្រជាជនចិន ដោយមានកិច្ចសហប្រតិបត្តិការដ៏ល្អ ពីក្រុមការងាររៀបចំសមយុទ្ធរបស់ភាគីកម្ពុជា យើងបានចុះទៅសិក្សាឱ្យកាន់តែច្បាស់លាស់ នៅទីលានបាញ់គ្រាប់ពិតរបស់កងពលតូចលេខ៧០ នៅឯស្រុកជុំគីរី ខេត្តកំពត៕
