ភ្នំពេញ៖ ក្នុងឱកាសអញ្ជើញបិទសិក្ខាសាលា ស្តីពីវិស័យព័ត៌មាន ក្រោមប្រធានបទ «អភិបាលកិច្ចល្អ នៅក្នុងបរិបទលំហូរព័ត៌មាន នាយុគសម័យបច្ចេកវិទ្យាឌីជីថល» នៅទីស្តីការគណៈរដ្ឋមន្ត្រី កាលពីល្ងាចថ្ងៃទី២២ ខែតុលា ឆ្នាំ២០១៩នេះ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានស្នើសុំឲ្យមន្ត្រីអ្នកនាំពាក្យគ្រប់ក្រសួង-ស្ថាប័នទាំងអស់ ត្រូវរួមគ្នាធ្វើការងារផ្នែកព័ត៌មានឲ្យបានសស្រាក់សស្រាំ ដើម្បីទប់ស្កាត់ និងលុបបំបាត់ព័ត៌មានក្លែងក្លាយ ដែលកំពុងវាយលុកយ៉ាងខ្លាំង នាំឲ្យជះឥទ្ធពលអាក្រក់ដល់សង្គមជាតិ។
អង្គភាពអ្នកនាំពាក្យរាជរដ្ឋាភិបាលកម្ពុជា បានអញ្ជើញមន្ត្រីពាក់ព័ន្ធ នៅតាមបណ្តាក្រសួង-ស្ថាប័ននានា អភិបាលរងរាជធានី-ខេត្ត និងមន្ត្រីទទួលបន្ទុកព័ត៌មានរាជធានី-ខេត្ត ទូទាំងប្រទេស ដើម្បីទប់ស្កាត់ និងបន្សាបព័ត៌មានក្លែងក្លាយ ដោយមានរយៈពេល២ថ្ងៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០១៩។
ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន យល់ឃើញថា អ្នកនាំពាក្យអសកម្មដោយសារមូលហេតុខ្លួនឯងផ្ទាល់ ពោលដោយសារខ្វះព័ត៌មានក្នុងការនាំពាក្យ ឬខ្វះកិច្ចសហការជាមួយអ្នកពាក់ព័ន្ធ នៅក្នុងក្រសួង ឬស្ថាប័នរបស់ខ្លួន។
លោកថ្លែងថា ទោះបីជាយ៉ាងណា ប្រសិនបើមិនផ្តល់ព័ត៌មានឲ្យអ្នកដែលចង់ដឹងព័ត៌មាន ឬមិនផ្តល់ដំណឹងដល់អ្នកព័ត៌មានទេ អ្នកនាំពាក្យរូបនោះនឹងត្រូវទទួលទោសទណ្ឌ បន្ទាប់ពីច្បាប់ស្តីពី សិទ្ធិទទួលបានព័ត៌មាន ត្រូវដាក់ឲ្យប្រើប្រាស់នៅពេលខាងមុខ។
ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា ក៏បានក្រើនរំលឹកថា អ្នកធ្វើជាមន្ត្រីផ្នែកព័ត៌មាន ឬធ្វើជាអ្នកនាំពាក្យសម្រាប់ក្រសួង ស្ថាប័ន ឬអង្គភាពណាមួយ ត្រូវតែមានសកម្មភាពឲ្យសកម្ម ប្រកបដោយវិជ្ជាជីវៈ និងប្រសិទ្ធភាពខ្ពស់។
លោក ឆាយ សុផល សាស្ត្រាចារ្យផ្នែកសារព័ត៌មាន យល់ឃើញថា អ្នកនាំពាក្យអសកម្ម គឺបណ្តាលមកពីក្រសួង ឬស្ថាប័នទាំងមូលអសកម្មតែម្តង។ ស្ថាប័នទាំងមូលអសកម្ម ដោយសារមិនបានធ្វើប្រតិភូកម្មអំណាច ផ្នែកព័ត៌មាននៃស្ថាប័ននោះសម្រាប់អ្នកនាំពាក្យឲ្យបានល្អ៕
