ខេត្តព្រះសីហនុ៖ លោកឧត្តមសេនីយ៍ត្រី ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ស្នើអោយមន្ត្រីក្រោមឱវាទ ប្រកាន់នូវក្រមសីលធម៌អោយបានខ្ជាប់ខ្ជួនខណៈពេលកំពុងបំពេញភារកិច្ច បើទោះបីបុគ្គលល្មើសច្បាប់ជាប្រជារាស្ត្រធម្មតា ឬអ្នកមានអំណាចក៏ដោយ។
ឯកឧត្តម ឧត្តមសេនីយ៍ត្រី បានថ្លែងបែបនេះនៅក្នុងវគ្គបណ្តុះបណញតាលស្តីពីនិតិវិធី ប្រតិបត្តិការ និងក្រមសីលធម៌ របស់នគរបាលចរាចរណ៍ផ្លូវគោក កាលពីព្រឹកថ្ងៃទី២៦ ខែតុលា ឆ្នាំ២០១៥ នៅសាលប្រជុំស្នងការដ្ឋាននគរបាលខេត្តព្រះសីហនុ ដោយមានការចូលរួមពី លោកវរៈសេនីយ៍ឯក អ៊ី សុខា ស្នងការរងទទួលការងារសណ្តាប់ធ្នាប់សាធារណៈ លោកនាយនាយរងការិយាល័យសណ្តាប់ធ្នាប់ លោកនាយ នាយរងផ្នែក លោកអធិការរងនាយផ្នែកទទួលការងារសណ្តាប់ធ្នាប់។
លោកឧត្តមសេនីយ៍ត្រី ឡុង ធូ បានណែនាំដល់មន្ត្រីនគរបាលជំនាញចរាចរណ៍ ទាំងអស់ត្រូវផ្សព្វផ្សាយ អនុវត្តច្បាប់ចរាចរណ៍ផ្លូវគោកថ្មី ហើយអោយមន្ត្រីជំនាញធ្វើការត្រួតពិនិត្យទៅលើរថយន្តដែលអាចបង្កការ គ្រោះថ្នាចរាចរណ៍ ដូចជារថយន្តសណ្តោង រថយន្តដឹកអ្នកដំណើរ រថយន្តដឹកកម្មករ រថយន្តក្រុងដឹកអ្នកដំណើរ ដែលអ្នកបើកបរគ្មានប័ណ្ណបើកបរ បើកបរលើសល្បឿនកំណត់ ដឹកលើសទម្ងន់ ។ល។
លោកឧត្តមសេនីយ៍ត្រីបានបញ្ចាក់បន្ថែមថា សូមអោយមន្ត្រីនគរបាលជំនាញចរាចរណ៍ទាំងអស់ត្រូវយកចិត្តទុកដាក់ស្តាប់ បទបង្ហាញ របស់លោកគ្រូបង្គោល និងមានក្រមសីលធម៌ ពេលចុះបំពេញការងារត្រូវស្លៀកពាក់ឯកសណ្ឋានអោយបានត្រឹមត្រូវ គោរពពេលវេលាបំពេញការងារ គោរពបទបញ្ជារបស់ថ្នាក់ដឹកនាំ ។
សូមរំលឹកថា គិតត្រឹមរយៈពេល៩ខែដើមឆ្នាំ២០១៥នេះ ខេត្តព្រះសីហនុ មានករណីគ្រោះថ្នាក់ចរាចរណ៍កើតឡើងចំនួន១៨៦ករណី (ជនបរទេស៣១ករណី) មានការកើនឡើង១៧ករណីបើប្រៀបធៀបទៅនឹងរយៈពេល៩ខែដើមឆ្នាំដូចគ្នាមាន ត្រឹម១៦៩ ករណីប៉ុណ្ណោះ ក្នុងនោះបង្កអោយមនុស្សស្លាប់ចំនួន៦១នាក់ ស្រី១១នាក់ រងរបួស២៩៥នាក់ ស្រី៦៦នាក់ និងរបួសធ្ងន់ចំនួន១៧២នាក់ ស្រី៣៣នាក់ ខូចខាតរថយន្ត១១០គ្រឿង ខូចខាតម៉ូតូចំនួន១៩៨គ្រឿង ខូចខាតកង់ចំនួន០១គ្រឿង៕
