ភ្នំពេញ៖ គណៈកម្មការជ្រើសរើសយុវជនស្ម័គ្រចិត្ត ចូលបម្រើកងយោធពលខេមរភូមិន្ទបំពេញក្របខ័ណ្ឌឱ្យកងទ័ពជើងគោក បានសេចក្តីជូនដំណឹងស្តីពី ការទប់ស្កាត់ភាពមិនប្រក្រតី នៅក្នុងដំណើរការជ្រើសរើសយុវជនស្ម័គ្រចិត្តចូលបម្រើកងយោធពលខេមរភូមិន្ទ បំពេញក្របខ័ណ្ឌឱ្យកងទ័ពជើងគោក។
សេចក្តីជូនដំណឹងរបស់កងទ័ពជើងគោកកាលពីថ្ងៃទី១ ខែវិច្ឆិកា បានអោយដឹងថា ដើម្បីផ្តល់ឱកាសប្រកបដោយតម្លាភាព និងយុត្តិធម៌ដល់យុវជនទូទៅក្នុងការដាក់ពាក្យចូលបម្រើកងយោធពលខេមរភូមិន្ទ ជាពិសេសចូលរួមទប់ស្កាត់ក្នុងករណីមានបុគ្គលមួយចំនួនឆ្លៀតឱកាស កេងចំណេញ សាធារណជន ជាពិសេសយុវជន ដែលមានបំណងចូលបម្រើការងារជាយោធិនក្នុងក្របខ័ណ្ឌកងទ័ពជើងគោក ត្រូវរាយការណ៍ជាបន្ទាន់ ដោយផ្ទាល់តាមទូរស័ព្ទលេខ 081319662 /081 319 688/ 099 306 162 / 099 253 677 /097 5 920 420/ 097 5 920 189។
គណៈកម្មការ ធ្វើការបញ្ជាក់ជាថ្មីម្តងទៀតថា «រាល់ការស្ម័គ្រចិត្តដាក់ពាក្យសុំបម្រើការងារក្នុងក្របខ័ណ្ឌកងទ័ពជើងគោក គឺមិនតម្រូវឱ្យបេក្ខជនបង់ប្រាក់ឡើយ។ រាល់បុគ្គលដែលប្រព្រឹត្តខុសនឹងគោលការណ៍ខាងលើនេះត្រូវទទួលខុសត្រូវចំពោះមុខច្បាប់ជាធរមាន»។
ក្នុងសេចក្តីជូនដំណឹងនោះ គណៈកម្មការជ្រើសរើសយុវជនស្ម័គ្រចិត្ត ចូលបម្រើកងយោធពលខេមរភូមិន្ទបំពេញក្របខ័ណ្ឌឱ្យកងទ័ពជើងគោក ក៏បានថ្លែងអំណរគុណយ៉ាងជ្រាលជ្រៅចំពោះសាធារណជន អាណាព្យាបាល និងបេក្ខជនទាំងអស់ ដែលសហការគាំទ្រដល់ដំណើរការជ្រើសរើសនេះឱ្យទទួលបានជោគជ័យ និងប្រសិទ្ធភាពខ្ពស់៕
