ភ្នំពេញ៖ កាលពីថ្ងៃទី១៥ វិច្ឆិកា ២០១៩នេះ លោកទូច សុខៈ ពិធីករព័ត៌មានទូរទស្សន៍ហង្សមាស បានសរសេរបង្ហោះលើបណ្តាញសង្គមហ្វេសប៊ុកថា “ផ្ទះកំសត់! ទម្រាំទិញផ្ទះនេះបាន ខ្ញុំបានឆ្លងកាត់បន្ទប់ជួល៤កន្លែង រួមមាន ជាន់ទីបួនម្ដុំអូឫស្សី ខាងកើតវត្តសន្សំកុសល ម្ដុំបឹងត្របែកខាងត្បូង និងនៅលើបឹងទំពន់ជាប់ផ្លូវ៣៧១។ ក្រោយមក ពីរនាក់ប្ដីប្រពន្ធបានសម្រេចចិត្តខ្ចីលុយធនាគារ ដោយបង់រំលោះរយៈពេលជាង១០ឆ្នាំទិញផ្ទះនេះក្នុងតម្លៃ២៥០០០ដុល្លារ”។
ដោយចិត្តស្រងេះស្រងោច លោកសុខៈលើកឡើងថា “គិតថា ចាំធូរធារបន្តិចនឹងជួសជុលឱ្យប្រសើរបន្តិចទុកជាអនុស្សាវរីយ៍ ដឹងអីត្រូវរងគ្រោះដោយអណ្ដាតភ្លើង។ ពេលវាឆេះខ្ញុំមិនបាននៅកន្លែងកើតហេតុទេ ដោយកំពុងផ្សាយព័ត៌មាននៅទូរទស្សន៍។ អ្វីដែលសឹងមិនជឿ គឺផ្សាយព័ត៌មានផ្ទះខ្លួនឯង តែមិនដឹងថាជាផ្ទះខ្លួនឯង! “
បើតាមរបាយការណ៍របស់នគរបាលជំនាញថា នៅវេលាម៉ោង ៩និង៣០នាទីព្រឹក ថ្ងៃទី១៥ ខែវិច្ឆិកា ឆ្នាំ២០១៩ មានអគ្គីភ័យមួយកន្លែងកើតឡើងនៅផ្ទះលេខ១២៧ ស្ថិតនៅតាមបណ្តោយផ្លូវលេខ២០២ ក្រុមទី២ ភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ រាជធានីភ្នំពេញ បណ្តាលមកពីការឆ្លងចរន្តអគ្គិសនី ។ម្ចាស់ផ្ទះរងឈ្មោះ អ៊ុច សុខហេង ភេទស្រី អាយុ៧២ឆ្នាំ មុខរបរជរានៅផ្ទះ ។ ផ្ទះរងគ្រោះធ្វើអំពីថ្មក្រោមឈើលើ ប្រក់ស័ង្កសី ទំហំ ៦ម៉ែត្រ គុណនឹង ១២ម៉ែត្រ ។
សូមបញ្ជាក់ថា ហេតុការណ៍ខាងលើ បានឆេះបំផ្លាញផ្ទះ២ខ្នងទាំងស្រុង និងរោលជញ្ជាំងផ្ទះដែលនៅក្បែរខាងអស់ចំនួន២ខ្នង តែមិនបណ្តាលឲ្យមានគ្រោះថ្នាក់មនុស្ស ទេ។
