ភ្នំពេញ៖ ក្នុងកិច្ចប្រជុំបូកសរុបលទ្ធផលការងារលទ្ធផលការងារសុវត្ថិភាពចរាចរណ៍ផ្លូវគោក រយៈពេល១០ខែដែលធ្វើឡើងនៅទីស្តីការក្រសួងសាធារណការ និងដឹកជញ្ជូន កាលពីរសៀល ថ្ងៃទី៣ ខែធ្នូឆ្នាំ២០១៩នេះ។
រដ្ឋមន្ត្រីក្រសួងសាធារណការ និងដឹកញ្ជូន លោកទេសរដ្ឋមន្ត្រី ស៊ុន ចាន់ថុល បានស្នើដល់អាជ្ញាធរមានសមត្ថកិច្ចពាក់ព័ន្ធ ឱ្យចុះត្រួតពិនិត្យ និងលុបបំបាត់យានដ្ឋានជួសជុល និងយានដ្ឋានកែច្នៃដំឡើងយានយន្តដែលគ្មានច្បាប់អនុញ្ញាត ឲ្យអស់ពីប្រទេសកម្ពុជានៅត្រឹមឆ្នាំ២០១៩នេះ។
លោកបញ្ជាក់យ៉ាងដូច្នេះថា៖ «ខ្ញុំសូមស្នើឲ្យអាជ្ញាធរសមត្ថកិច្ចនៅតាមរាជធានីខេត្ត ជំនាញទាំងអស់ត្រូវតែចុះពិនិត្យ ហើយលុបឲ្យអស់នូវយានដ្ឋានជួលជុល កែច្នៃ ដំឡើងឲ្យអស់ដែលនៅសល់២១ គ្មានច្បាប់អនុញ្ញាត»។
បើតាមលោកទេសរដ្ឋមន្ត្រី ស៊ុន ចាន់ថុល ការកែច្នៃ ជួសជុលខុសបច្ចេកទេស ក៏បង្កឲ្យមានគ្រោះថ្នាក់ និងមានបញ្ហាដល់សុវត្ថិភាពចរាចរណ៍ផងដែរ។ លោកទេសរដ្ឋមន្ត្រីបានសំណូមពរឲ្យលុបបំបាត់ឲ្យអស់នៅក្នុងខែធ្នូនេះ ហើយនៅឆ្នាំ២០២០ ត្រូវមានយានដ្ឋានកែច្នៃ ដំឡើង ជួសជុលត្រូវមានច្បាប់ឲ្យអស់»៕
