រតន:គីរី-លោក ងួន សុវណ្ណា មេនគរបាលវរការពារព្រំដែនគោកលេខ៦២៣ ឈរជើងតាមតំបន់ព្រំដែនក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនះគិរី ត្រូវបានប្រជាពលរដ្ឋនិងសមត្ថកិច្ចតូចតាច លើកឡើងថា គឺជាអ្នកឃុបឃិតឲ្យឈ្មួញដឹកជញ្ជូនឈើចេញទៅស្រុកយួនយ៉ាងពេញបន្ទុកដើម្បីជាថ្នូ
រនឹងផលប្រយោជន៍ផ្ទាល់ខ្លួន។
ប្រភពបានឲ្យដឹងទៀតថា ឈ្មួញដែលអាចដឹកឈើចេញទៅស្រុកយួនតាមច្រករបៀងភ្នំក្រហម សុទ្ធតែមានទំនាក់ទំនងជាមួយលោកងួន សុវណ្ណា មេនគរបាលវរការពារព្រំដែនគោកលេខ៦២៣ ក៏ដូចជាមេបញ្ជាការយោធាវរការពារព្រំដែន គោក លេខ១០២ ទើបបទល្មើសអាចប្រព្រឹត្តទៅដោយរលូន។
ជាងនេះទៅទៀត ប្រហែលជាសមត្ថកិច្ចអាវុធហត្ថស្រុកអូរយ៉ាដាវ មិនទទួលបានផលប្រយោជន៍ពីបទល្មើសដឹកជញ្ជូនឈើទៅស្រុកយួនតាមច្រករបៀងភ្នំក្រហម ទើបធ្វើការបង្ក្រាបបទល្មើសយកស្នាដៃបង្ហាញថ្នាក់លើតែម្តង។
ប្រភពពីសមត្ថកិច្ចតូចតាចក្នុងស្រុកអូរយ៉ាដាវ ខេត្តរតនគិរី បានឲ្យដឹងថានាពេលថ្មីៗ កម្លាំងអាវុធហត្ថស្រុកអូរយ៉ាដាវ និងអាវុធហត្ថខេត្តបានបង្ក្រាបរថយន្តឡង់គ្រីស័រកែច្នៃចំនួន៥គ្រឿងដែលដឹកជញ្ជូនឈើសុក្រំពេញៗ
បម្រុងឆ្លងដែនចូលទឹកដីយួន។
ការបង្ក្រាបនោះធ្វើឡើងនៅចំណុចភ្នំក្រហមក្នុងភូមិប៉ក់តូចឃុំប៉ក់ញ៉ៃស្រុកអូរយ៉ាដាវ ក្នុងចម្ការកៅស៊ូក្រុមហ៊ុន៧៤ នៅក្បែរព្រំដែនក្នុងពេលដែលរថយន្តទាំងនោះ ដឹកឈើចេញទៅស្រុកយួនតាមច្រករបៀងភ្នំក្រហម
ដែលមានប៉ុស្តិ៍សង្កេតការណ៍លេខ៦០១ ចំណុះឲ្យវរនគរបាលការពារព្រំដែនគោកលេខ៦២៣ និងប៉ុស្តិ៍យោធាចំណុះវរការពារព្រំដែនគោកលេខ ១០២។
ប៉ុន្តែអ្វីដែលធ្វើឲ្យប្រជាពលរដ្ឋរិះគន់គឺសមត្ថកិច្ចអាវុធហត្ថបង្ក្រាបបានតែរថយន្តនិងឈើដែល
ជាវត្ថុតាង ចំណែកក្រុមជនល្មើសអាចគេចខ្លួនអស់ដោយសុវត្ថិភាព។
សេចក្តីរាយការណ៍ពីមន្តី្រនគរបាលនិងមន្ត្រីយោធាតូចតាចក្នុងស្រុកអូរយ៉ាដាវ បានឲ្យដឹងថា ច្រករបៀងភ្នំក្រហម ដែលគ្រប់គ្រងដោយលោក យ៉ាត គឺជាច្រកដែលឈ្មួញដឹកជញ្ជូន ឈើចេញទៅស្រុកយួនយ៉ាងអនាធិបតេយ្យហើយទើប តែត្រូវកម្លាំងអាវុធហត្ថបង្ក្រាបយកស្នាដៃកាលពីថ្ងៃទី០៥ខែឧសភាឆ្នាំ២០១៧។
