ខេត្តកណ្ដាល៖ តៃកុងឡានម្នាក់ បើករថយន្តទាំងស្ថានភាពស្រវឹងគ្រឿងញៀន បានបុកពីក្រោយ រថយន្តសេរីទំនើប ម៉ាកលុច្សស៊ីស ៥៧០ ចំពីក្រោយពេញទំហឹង រងការខូចខាតយ៉ាងដំណំ។ ហេតុការណ៍នេះបានកើតឡើងកាលពីព្រឹក ថ្ងៃទី២១ ខែឧសភា ឆ្នាំ២០១៧ នៅចំណុចផ្លូវលំ ស្ថិតក្នុងភូមិខ្លាកូន ឃុំពើក ស្រុកអង្គស្នួល ខេត្តកណ្ដាល។
នគរបាលមូលដ្ឋាន បានឲ្យដឹងថា គេឃើញរថយន្ត១គ្រឿង ម៉ាកFUZO ប្រភេទបែន ពណ៌ក្រហមឆ្នូតទឹកមាស ពាក់ស្លាកលេខ ព្រៃវែង3A-0376 ធ្វើដំណើរពីត្បូងទៅជើង លុះដល់ចំណុចខាងលើ បានជ្រុលទៅបុកចំពីក្រោយរថយន្ត១គ្រឿងទៀត ម៉ាកLUXUS 570 ពណ៌ស គ្មានស្លាកលេខ ទិសដៅស្របគ្នា បណ្តាលឲ្យរថយន្តដែលនៅពីមុខនោះ រងការខូចខាតយ៉ាងដំណំ។
ប្រភពបន្តថា អ្នកបើកបររថយន្តបង្ក ឈ្មោះ អឿន លាប ភេទប្រុស អាយុ៣០ឆ្នាំ មុខរបរបើកឡាន មានទីលំនៅភូមិសំរោង ឃុំសូភី ស្រុកបាទី ខេត្តតាកែវ។ រីឯភាគីម្ខាងទៀត ឈ្មោះ អូន សុខុម ភេទប្រុស អាយុ៣៧ឆ្នាំ ទីលំនៅផ្ទះលេខB8 សង្កាត់ទឹកល្អក់៣ ខណ្ឌទួលគោក។
ក្រោយពេលកើតហេតុ កម្លាំងជំនាញ បានយករថយន្តទាំង២គ្រឿង ទៅរក្សាទុកនៅអធិការដ្ឋាន ដើម្បីដោះស្រាយតាមនិតិវិធីបន្ត៕
