ភ្នំពេញ៖ បុរសម្នាក់ត្រូវបានសមត្ថកិច្ចនាំខ្លួនទៅដោះស្រាយតាមនិតិវិធី នៅថ្ងៃទី១ ខែសីហា ឆ្នាំ២០១៩ វេលាម៉ោង៨និង៣០នាទីព្រឹក ក្រោយពីលោកតា និងម្តាយរបស់ជនរងគ្រោះទ្រាំមិនបាន បានចាប់ខ្លួនជនសង្ស័យដែលជាប្តីចុង ប្រគល់ឲ្យសមត្ថកិច្ចដោយផ្ទាល់តែម្តង។
សមត្ថកិច្ចបានឲ្យដឹងថា ជនសង្ស័យមានឈ្មោះ ខេង ហាន អាយុ៤៣ឆ្នាំ មុខរបរបុគ្គលិកស៊ិនទ្រី ជាឪពុកចុង។ ចំណែកជនរងគ្រោះឈ្មោះ ខ.ស.ផ ភេទស្រី អាយុ១៦ឆ្នាំ ជាកូនប្តីដើម។
ប្រភពព័ត៌មានបានឲ្យដឹងថា មុនពេលកើតហេតុ នៅថ្ងៃមិនចាំ ខែមិថុនា ឆ្នាំ២០១៨ វេលាម៉ោង១១និង៣០នាទីយប់ នៅចំណុចផ្ទះជួល ផ្លូវលំ ក្រុមទី៩ ភូមិព្រែកទាល់១ សង្កាត់ស្ទឹងមានជ័យទី២ ដែលមានជនរងគ្រោះ កំពុងដេកនៅក្នុងផ្ទះ( ចំនុចកើតហេតុ) ជាមួយប្អូនតូចៗចំនួន២នាក់ និងជនសង្ស័យត្រូវជាឪពុកចុង (ដែលជាប្តីក្រោយរបស់ម្តាយជនរងគ្រោះ) ស្របពេលដែលម្តាយរបស់ជនរងគ្រោះមិននៅផ្ទះ ពេលនោះជនសង្ស័យបានទៅចាប់សង្កត់ពីលើជនរងគ្រោះខ្ទប់មាត់គម្រាមសម្លាប់ បើសិនជនរងគ្រោះស្រែក រួមធ្វើសកម្មភាពចាប់ជនរងគ្រោះរំលោភសេពសន្ថវៈរហូតបានសម្រេចចំនួន០៣លើក រួចជនសង្ស័យបាន ចាប់ជនរងគ្រោះរំលោភជាបន្តបន្ទាប់ រហូតដល់ថ្ងៃទី១ ខែកក្កដា ឆ្នាំ២០១៩ ទើបជនសង្ស័យឈប់ចាប់ជនរងគ្រោះរំលោភសេពសន្ថវៈ ដោយជនរងគ្រោះមានផ្ទៃពោះចំនួន០៧ខែ។
រហូតដល់ថ្ងៃទី ៣១ ខែកក្កដា ឆ្នាំ២០១៩ ម្តាយនិងជីតាបង្កើតរបស់ជនរងគ្រោះសួរជនរងគ្រោះដឹងរឿងជនសង្ស័យចាប់រំលោភជនរងគ្រោះរហូតដល់មានផ្ទៃពោះ០៧ខែ ទើបដល់ថ្ងៃទី ០១ ខែសីហា ឆ្នាំ២០១៩ វេលាម៉ោង៨និង៣០នាទី ជីតា និងម្តាយបាននាំជនរងគ្រោះមកដាក់ពាកបណ្តឹង និងនាំខ្លួនជនសង្ស័យប្រគល់ឲ្យសមត្ថកិច្ចចាត់ការតាមផ្លូវច្បាប់។
បច្ចុប្បន្នជនសង្ស័យខាងលើ កំពុងឃាត់ខ្លួននៅអធិការដ្ឋានខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធីច្បាប់បន្តទៀត៕
