ខេត្តមណ្ឌលគិរី៖ លោក សៀក មុន្នីអភិបាលស្រុកអូររាំង បានធ្វើការបំភ្លឺមកគេហទំព័រយើងថាការឈូសឆាយធ្វើផ្លូវនៅក្នុងដីព្រៃរបស់រដ្ឋនិងចម្ការស្រល់ ដើម្បីបង្កលក្ខណៈងាយស្រួលដល់ប្រជាពលរដ្ឋក្នុងការធ្វើដំណើរ ហើយផ្លូវមួយខ្សែនោះមានប្រវែងជាង១០គីឡូម៉ែត្រ តភ្ជាប់ពីឃុំដាក់ដាំ ទៅឃុំសែនមនោរម្យ ស្រុកអូររាំង ។
លោកអភិបាលស្រុកអូររាំងបានឲ្យដឹងបន្តថា ការស្ថាបនាផ្លូវខាងលើបានធ្វើឲ្យប្រជាពលរដ្ឋ ជាពិសេសជនជាតិដើមភាគតិច រីករាយក្នុងការទទួលយកសមទ្ធិផលថ្មីមួយនេះ ហើយប្រជាពលរដ្ឋទាំង២ឃុំ ដែលអាស្រ័យផ្លូវខាងលើនេះ មានដល់ទៅជាង១០០០គ្រួសារ និងពលរដ្ឋដែលចាំបាច់ត្រូវធ្វើដំណើរឆ្លងកាត់មានជាង២០០គ្រួសារ។
លោកថា ក្រោយធ្វើផ្លូវថ្មីនេះរួច នឹងជួយកាត់បន្ថយការចំណាយរបស់ពលរដ្ឋ ព្រោះកន្លងមកពួកគាត់ត្រូវធ្វើដំណើរតាមផ្លូវមួយទៀត ដែលឆ្ងាយជាងផ្លូវកំពុងស្ថាបនា រហូតដល់ទៅជាង៣០គីឡូម៉ែត្រ ។
លោកអភិបាលស្រុកអូររាំង ក៏សូមបកស្រាយថា ផ្លូវថ្មីនេះ គឺធ្វើឡើងដើម្បីតែបម្រើប្រជាពលរដ្ឋតែប៉ុណ្ណោះ មិនដូចមតិមួយចំនួនយល់ច្រឡំថាផ្លូវនេះស្ថាបនាព្រោះតម្រូវការ បុគ្គលនោះទេ។
លោកបញ្ជាក់ទៀតថា ផ្លូវដែលកំពុងជួសជុលពង្រីកនេះ មានប្រវែងជាង១០គីឡូម៉ែត្រ ទទឹង៣០ម៉ែត្រ ជាប្រភេទផ្លូវក្រួសក្រហម ហើយជាកញ្ចប់ថវិកា ដែលលោកប្រមូលបានពីសប្បុរសជននានា មានខ្លះឧបត្ថម្ភជាសាច់ប្រាក់បានជាង១ម៉ឺនដុល្លា សប្បុរសជនខ្លះទៀត ឧបត្ថម្ភគ្រឿងចក្រសម្រាប់ស្ថាបនា និងឧបត្ថម្ភជាប្រេងម៉ាស៊ូតជាដើម។ លោក បន្តថា មិនយូរទេផ្លូវខាងលើនឹងកែសម្រួលរួចរាល់ អាចឲ្យពលរដ្ឋធ្វើដំណើរបានយ៉ាងងាយស្រួល។
ពាក់ព័ន្ធទៅនឹងការបកស្រាយរបស់លោកអភិបាលស្រុកអូររាំង ភ្នាក់ងារយើងនឹងធ្វើការផ្សាយបន្ត បើមានសេចក្តីរាយការណ៍មកថាការស្ថាបនាផ្លូវមួយខ្សែនោះមិនដូចការលើកឡើងរបស់លោកអភិបាលស្រុក៕
